Encyclopedia of Prophetic Hadiths

«Ad sẽn be dũni wã yikr tagmas-rãmbẽ, b na n wa zẽka (yẽesa) bãngre, tɩ zɩɩlem wʋsge, tɩ yoobã wʋsge, tɩ rãamã yũub wʋsge, tɩ raopã sõor lebg kɩdga, tɩ pagbã wʋsge, halɩ tɩ pagb pis-nu na n wa yaa raoa a yembr n yãs ne b yelle».

«Laa ɩlaaha ɩlla Allaah= soab sẽn na n tũ sɩd-sɩd ka be, sã n pa Wẽnd ye, wɩɩbd be ne laarab-rãmb ne yel-wẽng sẽn kolge, b paka a Yaaguug la a Maaguug gɩdrã rũndã wala wãndɩ». La a gilg a nu-bi-raoogã ne a nug-bi-tεεsdgã sẽn yεg-a wã, t'a Zaynab Bint Ǧahš yeele: Wẽnd Tẽn-tʋʋmã: b na n halka tõndo, tɩ nin-sõma yaool n be tõnd sʋkã? T'a yeele: «N-yee tɩ yel-wẽnã sã n wʋsge».

«A Hasan la a Hʋsayn, bãmb b yiibã yaa arzãnã rasãmb zu-raado».

M yeelame: yaa Wẽnd Tẽn-tʋʋmã, wilgd maam gomde, lɩslaangã pʋga, m sẽn kõn n le sok-a ned baa a yembr sã n ka foom, t'a yeele: «yeele: m kõo sɩd ne Wẽnde, rẽ poorẽ, tẽeg tɩrga».

«Ad rẽenem zãma sẽn kẽed arzãnã, b yalε wã yaa wala kiuug rasem piig la a naase, rẽ poorẽ neb nins sẽn pʋgd bãmbã b peelemã yɩɩda ãd-pɩndga saasẽ wã, b ka rʋʋte, b ka maan wa-kεεnga, b ka tʋbsde, b ka fẽesd b yõy ye, b zutã sãasdsã yaa sãnem, yũ-nood b sẽn fuusd yaa misk, b wisd laasã yaa wisd noodo, b pagb yaa Huuru ʿAyn, b bee rao a yembr tãa naaneg zugu, b saamb a Aadam yalε wã, yaa kãntɩɩs pis-yoob saasẽ wã».

«Wẽnd yeelɑme A nɑɑm zẽkame: Mɑm sekɑ M mengɑ n yi lɑgm-n-tɑɑrɑ rãmb lɑgm-n-tɑɑrã, ned ning sẽn tʋmɑ tʋʋmde n lɑgm bũmb zẽng ne mɑɑm ɑ tʋʋmdã pʋgẽ, m bɑsd-ɑ lɑme ne ɑ lɑgm-n-tɑɑrã».

«Wẽnde (A Naam zẽk yã) A na n yeela Bugum koɑmbã nang sẽn yɩɩdɑ valeng dũni yikr raarã: rẽ yĩnga fo sã n rag n tarẽ bũmb ning sẽn be Tẽngã gilli, f rag n na n yaoome n põs bɩɩ? T'a yeele: n-yee, tɩ Wẽnd yeele: Mam rag n rata fo nengẽ valeng sẽn yɩɩd woto, rẽnda tɩ fo be a Adam zãnkuidgẽ wã: tɩ f ra maan Maam lagem-n-taar baa fʋɩ, tɩ fo zãgs tɩ rẽndame tɩ fo maan lagem-n-taag ne Maam».

A ʿAli ɭbn Abɩɩ Ṭaalib (Wẽnd yard be a yĩnga) a tʋmame tɩ kẽng Wẽnd Tẽn-tʋʋmã nengẽ (Wẽnd pʋʋsg lɑ A tɩlgr be ɑ yĩngɑ) sẽn yi Yaman, sãnem sẽn be gãong sẽn nom pʋgẽ, la sãnemã b ka yɩlg-a n yi tomã ye. A yeelame, tɩ Nabiyaamã pʋɩ-a neb a naase, ʿƲyayna ɭbn Badre, ne Aƙraa ɭbn Haabis, la a Zayd Al-hayli, la naasẽ soabã, sã n ka Al-ƙama, yaa a ʿAamir ɭbn Aṭ-Ṭʋfayl, la ned n zĩnd Nabiyaam sahaabsẽ wã n yeele: tõnd n da sõmb ne yãwã n yɩɩd bãmbã, a yeelame, tɩ gom-kãng ta Nabiyaamã (Wẽnd pʋʋsg lɑ A tɩlgr be ɑ yĩngɑ) t'a yeele «Yãmb ka tar bas-m-yam ne maam, tɩ sẽn be-A saasẽ wã yaool n tar bas-m-yam ne maam, saagã kibar wata mam nengẽ yibeoog la zaabre», a yeelame: tɩ ned yiki, n yaa nin-kondo, t'a nin-kogdã yaa sẽn nuki, t'a rĩirã yaa sẽn yi, t'a toεεngã yaa sẽn tagme, t'a zugã yaa sẽn põnge, n põd a fu-sẽkã, n yeele: Wẽnd Tẽn-tʋʋmã, zoe Wẽnde, tɩ Nabiyaamã yeele: «Wɩɩbd be ne foom, rẽ yĩnga pa mam n sõmb ne Wẽn-zoεεg n yɩɩd Tẽngã zug rãmb sɩda?» A yeelame: rẽ poorẽ tɩ raoã looge. T'a Haalid ɭbn Waliid yeele: Wẽnd Tẽn-tʋʋmã, fo ka na n bas tɩ m rok a yiblã? Tɩ Nabiyaamã yeele: «Ayo, tõeeme t'a pʋʋsdame». T'a Haalid yeele: la sõor waoog pʋʋsdba sẽn yet ne a zelemdã bũmb ning sẽn ka be a sũurẽ wã, tɩ Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) yeele: «Ad b ka sagl maam tɩ m kɩds nebã sũyã, b ka sagl maam tɩ m pãrs b pʋsã». A yeelame: rẽ poorẽ tɩ Nabiyaamã ges-a t'a yaa sẽn gõd a kãarã n teesdẽ, n yeele: «Ad na n yii yãwã poorẽ wã, neba, sẽn karemd Wẽnd Gafã tɩ yaa noogo, la ka gãndgd b kokolondã ye, b yita dĩinã pʋgẽ wala peemd sẽn yit bõn-tãoodgẽ wã». Mam tẽedame t'a yeelame: «Mam sã n paam bãmbã, m na kʋ-b wala Samuud-rãmb kʋʋbo».