Encyclopedia of Prophetic Hadiths

«wakat ning Wẽn d sẽn wa n naan arzãnã la Bugmã, A tʋmsa a Gibriila, tɩlgr be a yĩnga, arzãnẽ wã, n yeel-a : « ges-a la f ges bũmb ning Mam sẽn sεgl a pʋgẽ wã, n na n kõ nebã ». T’a Gibriil ges-a n lebg wa yeele : m wẽen ne Fo zɩslemã, ned ka be, n na n wʋm yãwã kibare, rẽndame t’a kẽ-a. Tɩ Wẽnd sagl tɩ b gũbg arzãnã ne yεl nins yõor sẽn kisã. La A yeel-a « ges-a la bũmb ning Mam sẽn sεgl tɩ be a pʋgẽ wã, n na n kõ nebã» . T’a lebg n tɩ ges-a, n mik tɩ b gilg-a lame ne yεl nins yõor sẽn kisi. T’a Gibriil yeele: “ m wẽen ne Fo zɩslemã, m yεεsdame tɩ ned baa a yembr kõn n kẽ-a ye” T’a yeele: kẽng n tɩ ges Bugmã la f ges bũmb ning Mam sẽn sεgl a pʋgẽ, n na n bĩng a nebã. T’a tʋg n ges-a, n mik tɩ Bugmã zombda taaba, t’a lebg n wa n yeel Wẽnde: “ m wẽen ne Fo zɩslemã ned baa a yembr kõn n kẽ yãwã ye”. Tɩ Wẽnd sagl tɩ b gilg Bugmã ne yõor yamleoog teedo, tɩ Wẽnd yeel-a: “lebg n tɩ ges-a”. T’a Gibriil tʋg n ges-a, n mik t’a yaa sẽn gũbg ne yõyã yamleoodo, t’a lebg n wa yeele: “ m wẽen ne Fo zɩslemã, ad mam yεεsdame tɩ ned baa a yembr ka na n põse, n ka kẽ Bugmã ye».

«Ad yãmb Soabã yaa yãn-Zoεta n yaa Kõta, A zoeta yãnd ne A yamba t'a sã n zẽk a nus a yiibã n tʋg A nengẽ t'A lebs b yiibã zaalem».

Yii Nabiyaamã nengẽ (Wẽnd pʋʋsg la A tɩlgr be a yĩnga) t'a rag n yɩɩme t'a sã n kẽ miisrã, a yetame: «Aʿʋʋzʋ Billaahɩ Al-ʿAẓɩɩm, Wabɩ waghɩhɩɩ Alkarɩɩm, wa sʋlṭaanɩhɩɩ Alƙadɩɩm, Min Aš-šayṭaan Arragɩɩm= m kota gũudum ne Wẽnd sẽn Zɩsã, la ne A Nengã sẽn yaa Wagellã, la A Naamã sẽn yaa kʋdrã, n yi a sʋɩtãan b sẽn lobã», tɩ ned yeele: sεε woto? Tɩ mam yeele: n-yee. T'a yeele: a sã n yeel woto, la sʋɩɩtãanã sẽn yeele: b gũ-a lame n yi maam raarã gilli.

«A rag n yɩɩme t'a sã n vẽeg beoogo a yeteme: M Soab A Wẽnde, d vẽega beoog ne Fo yʋʋrã, la d ta zaabr ne Fo yʋʋrã, la ne Fo yʋʋrã la d vɩ la ne Fo yʋʋrã la d kiida, la d lebgr zĩig yaa Fo nengẽ» la a sã n ta zaabre, a yetame: «D taa zaabr ne Fo yʋʋrã la d vẽega beoog ne Fo yʋʋrã, la ne Fo yʋʋrã la d vɩ la ne Fo yʋʋrã la d kiida, la d lebeng zĩig yaa Fo nengẽ». La vugri a yeelame: «Lebgr zĩig yaa Fo nengẽ».

«Ned ning sẽn rɩ rɩɩbo, n yeele: Alhamdu lillaahi Allaḏii aṭ-ʿamanii haaḏaa, wa razaƙaniihi min ġayri hawlin minnii walaa ƙuwwatin= (Pẽgr be ne Naab ning sẽn rɩlga maam wãndã, la A lok-a maam, tɩ ka tũ ne sɩlem, la pãnga sẽn yi mam nengẽ), b yaafda a zũnuub sẽn reng taoore».