Пайгамбар хадистеринин энциклопедиясы

«Кимде-ким Рамазанды ыйман келтирип жана сооп үмүт кылып орозо кармаса, анда анын мурунку күнөөлөрү кечирилет».

Пайгамбардын (ага Аллахтын тынчтыгы жана мактоосу болсун) сахабаларынан кээ бир адамдар түшүндө Кадыр түндүн акыркы жети түндө болорун көрүштү. Анан Аллахтын Элчиси (ага Аллахтын тынчтыгы жана мактоосу болсун): «Силердин түшүңөрдүн акыркы жети түнгө дал келгенин көрүп турам. Ким аны издей турган болсо, акыркы жети түндөн издесин»,– деп айтты.

"Чындыгында, бейиште Райян деп аталган бир эшик бар. Кыямат күнү андан орозо кармагандар кирет, андан алардан башка эч ким кирбейт. Орозо кармагандар кайда? – деп айтылат. Ошондо алар турушат да, алардан башка эч ким андан кирбейт. Качан алар кирип бүткөндө, ал эшик жабылат да, андан эч ким кирбейт."

"Ислам беш нерсеге (түркүккө) негизделген : Аллахтан башка ибадатка татыктуу кудай жок, Мухаммад Анын кулу жана элчиси деп күбөлүк берүү, намаз окуу, зекет берүү, (Каабага) ажылык кылуу, Рамазанда орозо кармоо".

Бир киши Аллахтын элчисинен (ага Аллахтын тынчтыгы жана мактоосу болсун) минтип сурады: «Айтыңызчы, мен парз намаздарын окуп, Рамазан орозосун кармасам, адалды адал деп билип, арамды арам деп билсем жана бул нерселерге эч нерсе кошпосом, анда мен бейишке киреминби?» Пайгамбарыбыз (ага Аллахтын тынчтыгы жана мактоосу болсун): «Ооба» - деди.

"Аллах Таала айтат: "Адам баласынын бардык амалы өзү үчүн. Бир гана орозосу андай эмес. Анын орозосу Мен үчүн жана анын сооп-сыйын Мен Өзүм берем". Орозо - бул, калканч. Кимдир бирөөңөр орозо кармасаңар, ал күндө жаман сөздөрдү сүйлөбөгүлө, кыйкырып, талашып-тартышпагыла. Эгер орозо адамды бирөө тилдеп же мушташмакчы болсо, ага "мен орозо кишимин" деп айтсын. Мухаммаддын жаны колунда турган Аллахка ант берип айтам, орозо кармаган адамдын оозунан чыккан жыт Аллахтын алдында мисктин жытынан да жыттуу. Орозо туткан адамдын сүйүнө турган эки убагы бар: биринчиси, ооз ачкан убакта кубанат. Экинчиси, Раббисине жолуккан учурда бул дүйнөдө орозо тутканына кубанат".

"Кимде-ким никенин акысын бере алса, анда үйлөнсүн. Анткени үйлөнүү көзгө көшөгө жана зынадан коргоочу болот. Кимде-ким никенин акысын бере албаса, анда ага орозо кармоо зарыл, анткени орозо аны бычкан сыяктуу шакыбатын токтотот".

Ал мага: «Сен чындыгында эле жыл бою (күн сайын) орозо тутуп, түнү бою (ибадат кылып) намазда турасыңбы?» - деди. Мен: «Ооба», - деп жооп бердим. Ал айтты: «Эгер сен ушинтип уланта берсең, көзүң чуңкурайып, денең алсырайт. Жыл бою (тынбай) орозо кармаган адам орозо туткан болуп эсептелбейт. (Ар айда) үч күн орозо тутуу — бул бүтүндөй жыл бою орозо тутууга тең келет». Мен: «Менин мындан да көбүрөөккө күчүм жетет», - дедим. Ал: «Анда Дауд пайгамбардын орозосун тут! Ал бир күн тутуп, бир күн оозу ачык жүргөн жана (душманга) жолукканда эч качан артка каччу эмес»,— деп айтты.