Encyclopedia of Prophetic Hadiths

((ئێك ژ هه‌وه‌ باوه‌رییێ نائینیت هه‌تا ئه‌ز ل ده‌ڤ وی خۆشتڤیتر نه‌بم ژ دایبابێن وی و زارۆكێن وی و خه‌لكی هه‌مییێ)).

((هه‌ر كه‌سێ گه‌ره‌نتییێ (زه‌مانه‌تێ) بده‌ته‌ من كو ئه‌و تشتێ د ناڤبه‌را هه‌ردوو ڵامێن خۆ (ئانكو: ئه‌زمانێ خۆ) و ئه‌و تشتێ د ناڤبه‌را هه‌ردوو لنگێن خۆ (ئانكو: عه‌وره‌تێ خۆ) بپارێزیت؛ ئه‌ز ژی دێ گه‌ره‌نتییا چوونا به‌هه‌شتێ ده‌مه‌ وی)).

«كارێ باوه‌رداری یێ سه‌یره‌، ب ڕاستی هه‌می كارێن وی خێرن و ئه‌ڤه‌ بۆ چ كه‌سێن دی نینه‌ ب تنێ باوه‌ردار نه‌بیت، ئه‌گه‌ر خۆشییه‌ك گه‌هشتێ؛ سوپاسییا خودێ دكه‌ت، ئه‌ڤه‌ بۆ وی خێره‌، ئه‌گه‌ر نه‌خۆشییه‌ك گه‌هشتێ؛ هه‌دارێ دكێشیت، ئه‌ڤه‌ ژی بۆ وی خێره‌».

((نینه‌ زه‌لامه‌ك هه‌بیت گونه‌هه‌كێ بكه‌ت، پاشی ڕابیت و ده‌ستنڤێژێ بگریت، پاشی نڤێژێ بكه‌ت، پاشی داخوازا ژێبرنا گونه‌هێ ژ خودێ بكه‌ت؛ خودێ دێ گونه‌ها وی بۆ وی ژێبه‌ت))، پاشی ئه‌ڤ ئایه‌ته‌ خواند: {وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللهَ فَاسْتَغْفَرُوا لِذُنُوبِهِمْ} [آل عمران: 135]. ئانكو: ((و ئه‌وێن هه‌ر ده‌مێ كاره‌كێ پیس ئه‌نجام دده‌ن یان زۆرداریێ ل نه‌فسا خۆ دكه‌ن، بیرا وان ل خودێ دئێته‌ڤه‌ و داخوازا لێبوورینێ بۆ گونه‌هێن خۆ دكه‌ن)).

((مرن دێ ل سه‌ر شێوه‌یێ به‌رانه‌كێ ڕه‌ش و سپی هێته‌ ئینان پاشی گازیكه‌ره‌ك دێ كه‌ته‌ گازی: ئه‌ی خه‌لكێ به‌حه‌شتێ؛ ئه‌و ژی دێ سه‌رێ خۆ بلند كه‌ن و به‌رێ خۆ ده‌نێ، گازیكه‌ر دێ بێژیت: ئه‌رێ هوین ڤى دنیاسن؟ دێ بێژن: به‌لێ، ئه‌ڤه‌ مرنه‌، هه‌مییان ئه‌و یا دیتی، پاشی دێ كه‌ته‌ گازی: ئه‌ی خه‌لكێ جه‌هنه‌مێ؛ ئه‌و ژی دێ سه‌رێ خۆ بلند كه‌ن و به‌رێ خۆ ده‌نێ، گازیكه‌ر دێ بێژیت: ئه‌رێ هوین ڤى دنیاسن؟ دێ بێژن: به‌لێ، ئه‌ڤه‌ مرنه‌، هه‌مییان ئه‌و یا دیتی، پاشی دێ هێته‌ ڤه‌كوژتن، پشتی هنگی دێ هێته‌ گۆتن: گه‌لی خه‌لكێ به‌حه‌شتێ؛ ئێدی مانه‌ڤه‌یا هه‌روهه‌ره‌ و مرن نینه‌ و گه‌لی خه‌لكێ جه‌هنه‌مێ؛ ئێدی مانه‌ڤه‌یا هه‌روهه‌ره‌ و مرن نینه‌، پاشی ئه‌ڤ ئایه‌ته‌ خواند: {وَأَنْذِرْهُمْ يَوْمَ الحَسْرَةِ إِذْ قُضِيَ الأَمْرُ وَهُمْ فِي غَفْلَةٍ} [مريم: 39]، ئانكو: ((و تو - ئه‌ى موحه‌ممه‌د - مرۆڤان ژ ڕۆژا په‌شیمانییێ بترسينه‌ ده‌مێ كار دهێته‌ پێكئينان و مرنێ دئينن وه‌كى به‌رانه‌كێیه‌ و ڤه‌دكوژن و حوكم د ناڤبه‌را خه‌لكیدا دهێته‌ كرن، ڤێجا خودان باوه‌ر دچنه‌ به‌حه‌شتێ و كافر دچنه‌ جه‌هنه‌مێ و ئه‌و ئه‌ڤرۆ د ڤێ دونيايێدا ژ وى تشتێ ئه‌و ژێ دهێنه‌ ترساندن دبێ ئاگه‌هن))، و ئه‌و خه‌لكێ دونیایێ یێن د بێئاگه‌هییێدا {وَهُمْ لاَ يُؤْمِنُونَ} [مريم: 39]، ئانكو: ((و ئه‌و باوه‌رییێ نائينن و كارێ چاك ناكه‌ن)).

((خۆ ژ وان هه‌ر حه‌فت گونه‌هێن مرۆڤی دبه‌نه‌ هیلاكێ دویربێخن. گۆتن: ئه‌و كیژكن ئه‌ی پێغه‌مبه‌رێ خودێ؟ گۆت: شرك و هه‌ڤپشك دروستكرن بۆ خودێ، سحر و سێره‌به‌ندی، كوشتنا وێ نه‌فسا خودێ حه‌رامكری بهێته‌ كوشتن، ئه‌و تێنه‌بیت ئه‌گه‌ر ئه‌ڤ كوشتنه‌ ب حه‌قی بیت، خوارنا ڕیبایێ، خوارنا مالێ ئێتیمی، ڕه‌ڤینا ژ به‌رووكا شه‌ڕی ل ده‌مێ جیهادێ و تاوانباركرنا ژنێن پاقژ و باوه‌ردار و بێئاگه‌ھ ب كرنا زینایێ)).

«عه‌دوا (ڤه‌گوهاستنا نه‌خۆشییێ ژ ئێكی بۆ ئێكی ب خۆرستی ئانكو ئه‌و ب خۆ كارتێكرنێ بكه‌ت بێی حه‌زا خودێ ل سه‌ر بیت) نينه‌ (به‌لكی ئه‌و ب حه‌زا خودێیه‌)، طيه‌ره‌ (فالگرتن ب بالنده‌یان و تشتێن دی) نينه‌، هامه (باوه‌رییا ب گیانێ مرییان يان مرۆڤێن خراب) نينه‌، و صه‌فه‌ر (كو هه‌یڤا صه‌فه‌رێیه‌ یا ناڤدار، ئه‌وان باوه‌ری هه‌بوو ئه‌ڤ هه‌یڤه‌ باشی و خرابییان د گه‌ل خۆ دئینیت) نينه‌، و ژ كه‌سێ تووشی نه‌خۆشییا (جوزام)ـێ بووی بڕه‌ڤه‌ وه‌كی چاوا تو ژ شێری دڕه‌ڤی».

«مه‌ته‌لا هه‌ڤالێ باش و هه‌ڤالێ خراب وه‌كی خودانێ مسكێ و ئه‌وێ كویرها ئاسنی (كو ئاسنگه‌ره‌) خۆش دكه‌ت،‌ خودانێ مسكێ: یان دێ هنده‌كێ ده‌ته‌ ته‌، یان دێ ژێ كڕی، یان ژی دێ بێهنه‌كا خۆش ژێ هێته‌ ته‌. به‌لێ هندیكه‌ ئه‌وه‌ یێ كویرها ئاسنی خۆش دكه‌ت‌: یان دێ جلكێن ته‌ سۆژیت، یان ژی دێ بێهنه‌كا پیس ژێ هێته‌ ته‌».