Encyclopedia of Prophetic Hadiths

((باشی ڕه‌وشتێ جوانه‌، خرابی ژی ئه‌و تشته‌ یێ د سنگێ ته‌دا بهێت و بچیت و ته‌ پێ نه‌خۆش بیت خه‌لك پێ ئاگه‌هدار بن)).

((مرۆڤێ ب هێز ئه‌و نینه‌ یێ د زۆڕانبازییێدا یێ ب هێز بیت‌، به‌لكی مرۆڤێ ب هێز ئه‌وه‌ یێ ل ده‌مێ توڕه‌بوونێ بشێت خۆ ڕاگریت و كونتڕۆلێ ل سه‌ر خۆ بكه‌ت)).

پێغه‌مبه‌ر (صه‌لات و سه‌لامێن خودێ ل سه‌ر بن) د به‌ر دوو گۆڕاندا ده‌ربازبوو و گۆت: ((ئه‌و هه‌ردوو یێن دهێنه‌ سزادان و ئه‌و ل سه‌ر تشته‌كێ وه‌سا ناهێنه‌ سزادان كو ل ده‌ڤ هه‌وه‌ یێ مه‌زن بیت (به‌لێ ل ده‌ڤ خودێ یێ مه‌زنه‌)، یێ ئێكێ خۆ ژ میزێ نه‌دپاراست، یێ دی ژی ئاخڤتن ڤه‌دگوهاستن (فه‌سادی دكر))). پاشی چه‌قه‌كێ ته‌ڕ یێ دارخورمێ ئینا و كره‌ دوو كه‌ر و ل سه‌ر هه‌ر گۆڕه‌كی ئێك چكلاند. گۆتنێ: ئه‌ی پێغه‌مبه‌رێ خودێ، ته بۆچی‌ ئه‌ڤه‌ كر؟ گۆت: ((دا به‌لكی هندی هشك نه‌بووین سزای ل سه‌ر وان سڤك بكه‌ن)).

(( نه‌رمى د هه‌ر تشته‌كيدا بيت دێ جوان كه‌ت ، و هه‌ر تشته‌كێ نه‌رمى ژێ بهێته‌ ده‌رئينان دێ كرێت كه‌ت)).

((مسوگه‌ر خودێ چاكی ل سه‌ر هه‌می تشتان نڤیسییه‌، ڤێجا ئه‌گه‌ر هه‌وه‌ كوشتن كر؛ هوین ب جوانی بكه‌ن، و ئه‌گه‌ر هه‌وه‌ ڤه‌كوشتن كر؛ هوین جوان ڤه‌كوژن، و بلا ئێك ژ هه‌وه‌ كێركا خۆ خۆش بكه‌ت و بلا قوربانی و ڤه‌كوشتییێ خۆ ژی ڕحه‌ت بكه‌ت)).

پێغه‌مبه‌رێ خودێ (صه‌لات و سه‌لامێن خودێ ل سه‌ر بن) پاشڤه‌برن ژ قه‌زه‌عێ كر (قه‌زه‌ع ژی ئه‌ڤه‌یه‌ مرۆڤ هنده‌ك ژ پرچا خۆ بتڕاشیت و هنده‌كێ بهێلیت).

((حه‌سویدییێ ب ئێكودوو نه‌به‌ن، ئێكودوو نه‌خاپینن، كه‌ربێ ژ ئێك و دوو ‌ڕانه‌كه‌ن، پشتا خۆ نه‌ده‌نه‌ ئێكودوو، هنده‌ك ژ هه‌وه‌ فرۆتنێ ل سه‌ر فرۆتنا هنده‌كێن دیڕا نه‌كه‌ن، ببنه‌ عه‌بدێن خودێ و برایێن ئێك، موسلمان برایێ موسلمانییه‌، نه‌ زۆڕدارییێ لێ دكه‌ت، نه‌ پشتا وی به‌ردده‌ت و وی شه‌رمزار دكه‌ت، و نه‌ وی كێم دكه‌ت، ته‌قوا یا د ڤێرێدا)) سێ جاران ئاماژه‌ كره‌ سینگێ خۆ ((ئه‌و خرابی ب تنێ تێرا مرۆڤی هه‌یه‌ كو مرۆڤ برایێ خۆ یێ موسلمان كێم بكه‌ت، موسلمان هه‌می ل موسلمانی یێ حه‌رامه‌، خوینا وی و مالێ وی و نامویسا وی)).

زه‌لامه‌ك هاته‌ ده‌ڤ پێغەمبەری (صه‌لات و سه‌لامێن خودێ ل سه‌ر بن) و گۆت: ده‌وارێ من یێ مری، ڤێجا ده‌واره‌كی بده‌ من لێ سویار بم، ئینا گۆت: ((من (چ ده‌وار) نینن))، ئینا زه‌لامه‌كی گۆت: ئه‌ی پێغه‌مبه‌رێ خودێ؛ ئه‌ز دێ به‌رێ وی ده‌مه‌ ئێكی كو ده‌واره‌كی بده‌تێ، پێغەمبەرێ خودێ (صه‌لات و سه‌لامێن خودێ ل سه‌ر بن) گۆت: ((هەر کەسێ به‌رێ ئێكی بده‌ته‌ خێر و باشییه‌كێ، دێ هندی وی كه‌سێ وێ خێرێ دكه‌ت؛ خێر گه‌هیته‌ وی كه‌سێ به‌رێ وی دایێ)).