Peyğəmbər Hədisləri Ensiklopediyası

" Kim gözəl surətdə dəstəmaz alarsa, günahları cəsədindən, hətta dırnaqlarının altından çıxar."

Bir kişi dəstəmaz aldı və ayağında dırnaq boyda yuyulmayan yer buraxdı. Peyğəmbər (Allahın salavatı və salamı onun üzərinə olsun) bunu gördü və dedi: “Geri qayıt və dəstəmazı gözəl şəkildə al!”. O kişi qayıdıb yenidən dəstəmaz aldı, sonra namaz qıldı.

Amr ibn Əbu Həsənin Abdullah ibn Zeyddən Peyğəmbərin (Allahın salavatı və salamı onun üzərinə olsun) dəstəmazı haqqında soruşduğunun şahidi oldum.O, bir qab su istədi və onlar üçün Peyğəmbərin (Allahın salavatı və salamı onun üzərinə olsun) aldığı şəkildə dəstəmaz aldı. Belə ki o, əlinə qabdan su tökdü və əllərini üç dəfə yudu, sonra əlini qabın içinə saldı, ondan üç ovuc götürüb ağzını yaxaladı, burnuna su çəkdi və sonra suyu çölə çıxardı. Sonra əlini qaba salıb üzünü üç dəfə yudu, sonra iki dəfə əllərini dirsəklərə qədər yudu, sonra əlini qaba salaraq başın önündən arxaya və arxadan önə olmaqla, başına bir dəfə məsh çəkdi, sonra ayaqlarını topuğa qədər yudu.

"Bir müsəlman gözəl şəkildə dəstəmaz alar, sonra qalxıb iki rükət namaz qılar və bu iki rükətə qəlbi və üzü ilə yönələrsə, ona Cənnət vacib olar" Dedi: Mən də dedim: Bu necə də gözəldir! Elə bu vaxt qarşımda bir kəs dedi: “Bundan öncəki daha gözəl idi" Gördüm ki, Ömərdir və O, dedi: “Sənin bir az əvvəl gəldiyini gördüm. Sonra əlavə etdi: “Sizdən kim dəstəmaz alar və dəstəmazını kamil şəkildə yerinə yetirər, sonra: "Əşhədu əllə iləhə illallah və ənnə Muhəmmədən əbdullahi va rasuluhu" deyərsə, onun üçün Cənnətin səkkiz qapısı açılar və o, istədiyi qapıdan daxil olar”.