Encyclopedia of Prophetic Hadiths

«Maam la nebã zu-soaba dũni yikr raare, la rẽ yĩngã yãmb mi yẽ sẽn yaa a soab bɩɩ?Wẽnd tigimada rẽenem rãmbã la yaoolem rãmbã zĩ-peell a yembr pʋga, tɩ boaandã wʋmsd-b fãa gilli, tɩ nin ne-b lame, tɩ wĩndgã pẽnege, tɩ nebã wa tʋg n ta keelemã la yɩɩgrã b sẽn ka tõe, tɩ nebã yetẽ: yãmb ka ne y sẽn ta zĩig ningã, y ka na n bao ned sẽn na n yõk sẽega y Soabã nengẽ? Tɩ nebã sãnda yeel taaba: yõk-y-yã a Adam. Tɩ b wa a Adam nengẽ, (tɩlgr be a yĩnga, n yeel-a: foom la ninsaalba saamba, Wẽnd naana foom ne A Nugu, la A fʋʋs A Vɩɩmã fo pʋgẽ la A sagl malεgsã tɩ b maan suguud fo yĩnga, kos f Soabã sugr tõnd yĩnga, fo ka ne tõnd sẽn ta bũmb ningã? T'a Adam yeele: Ad mam Soabã gẽe rũnda gẽeg ninga A sẽn ka gẽ a buud tɩ looge, A ka na n leb n gẽ a buud yεs ye, la ad A rag n gɩdga maam tɩ m ra rɩ tɩɩgã tɩ mam kɩɩs-A, mam meng yell n pak maam, m kũmda m menga, m kũmda m menga. Kẽng-y zẽng sẽn ka maam nengẽ, kẽng-y a Nuuh nengẽ. Tɩ b wa a Nuuh nengẽ, n wa yeele: Huuhu, foom la Tẽn-tʋʋmbã rẽenem n tʋg Tẽngẽ wã, la Wẽnd pʋda foom tɩ yamb sẽn yaa bark pʋʋsda, kos sugr f Soabã tõnd yĩnga, fo ka ne tõnd sẽn be bũmb ning pʋga? T'a yeele: Ad mam Soabã gẽe rũnda gẽeg ninga A sẽn ka gẽ a buud tɩ looge, A ka na n leb n gẽ a buud yεs ye, la ad A rag n tara doaag msẽn sõmb n kos, la mam rɩk-a lame n kõs tɩ Wẽnd halk m nebã, mam meng yell n pak maam, m kũmda m menga, m kũmda m menga. Kẽng-y zẽng sẽn ka mam nengẽ, kẽng-y-yã a ɭbraahɩɩm nengẽ, tɩ wa a ɭbraahɩɩm nengẽ n yeele: ɭbraahɩɩma, foom la Wẽnd Nabiyaam la a nonga Tẽngã rãmb nengẽ, kos sugr f Soabã d yĩnga, fo ka ne tõnd sẽn be bũmb ning pʋgã? T'a yeel-ba: Ad mam Soabã gẽe rũnda gẽeg ninga A sẽn ka gẽ a buud tɩ looge, A ka na n leb n gẽ a buud yεs ye, la ad A rag n yaga yagb a tãabo, mam meng yell n pak maam, m kũmda m menga, m kũmda m menga. Kẽng-y zẽng sẽn ka mam nengẽ, kẽng-y-yã a Muusa nengẽ. Tɩ b wa a Muusa nengẽ n yeele: Muusa, foom la Wẽnd Tẽn-tʋʋma, Wẽnd yɩɩsa foom nebã zugu ne A tẽn-tʋʋmbdã la A goamã, kos f Soabã sugr tõnd yĩnga, t'a yeele: Ad mam Soabã gẽe rũnda gẽeg ninga A sẽn ka gẽ a buud tɩ looge, A ka na n leb n gẽ a buud yεs ye, la mam rag n kʋʋ yõore, b sẽn ka sagl maam tɩ m kʋ-a, mam meng yell n pak maam, m kũmda m menga, m kũmda m menga. Kẽng-y zẽng sẽn ka mam nengẽ, kẽng-y-yã a ɭɩsa a Maryam biigã nengẽ. Tɩ b wa a ɭɩsa nengẽ n yeele: ɭɩsa, fo yaa Wẽnd Tẽn-tʋʋma, n leb n yaa A gomde A sẽn lob-a a Maryam nengẽ, n leb n yaa Vɩɩm sẽn yi A nengẽ, fo goma ne nebã fo sẽn wa n be futẽ n yaa bi-bilfu, kos f Soabã sugr tõnd yĩnga, fo ka ne tõnd sẽn be yell ning pʋgã, t'a yeele: Ad mam Soabã gẽe rũnda gẽeg ninga A sẽn ka gẽ a buud tɩ looge, A ka na n leb n gẽ a buud yεs ye, la a ka togs zũnuub ye, mam meng yell n pak maam, m kũmda m menga, m kũmda m menga. Kẽng-y zẽng sẽn ka mam nengẽ, kẽng-y-yã a Mʋhammad nengẽ. Tɩ b wa a Mʋhammad nengẽ n yeele: Mʋhaamad, fo yaa Wẽnd Tẽn-tʋʋma, la nabiyaam-rãmbã Pidsda la Wẽnd yaafa foom f zũnuub-rãmb sẽn reng taoore la sẽn yaoolge, kos f Soabã sugr tõnd yĩnga, fo ka ne tõnd sẽn be bũmb ning pʋgẽ wã? Tɩ mam loog n kẽng Al-arsã tẽngre, n lʋɩ n maan m Soabã suguudu, (A Naam yɩ wagell n zẽke, rẽ poorẽ tɩ Wẽnd pak n wilg maam sẽn yaa A pẽgb la A soeesg yεla, A sẽn rag n ka pak n wilg maam sẽn reng taoor ye. Rẽ poorẽ tɩ b yeele: Mʋhammad zẽk f zugã n kos tɩ b na n kõ-f lame, la f kos sugr tɩ b na reega f sugrã. Tɩ mam zẽk m zugã n yeele, m poorẽ rãmbã, m Soab A Wẽnde, m poorẽ rãmbã yelle, m Soab A Wẽnde! Tɩ b yeele: Mʋhammad kẽes fo poorẽ rãmbã neb nins geelg sẽn ka be b rãmb zugã arzãnã rɩtg ragnoorã. La b na n leb n lagema nebã n kẽ ragnoy nins sẽn ketã. Rẽ poorẽ tɩ Nabiyaamã yeele: m wẽen ne Naab ning mam yõorã sẽn be A Nugẽ wã, sẽn be arzãnã regnoorã kɩrems a yiibã sʋka yaa wala Mak la himyar sʋka, -maa Mak la Busraa sʋka-»

«Dũni wã ka yikdi halɩ tɩ wĩntoogã wa tʋg n puk a sẽn lʋɩtẽ wã, rẽnd a sã n wa tʋg n puk a sẽn lʋɩt zĩig ningã, tɩ nebã yã-a, b fãa gill na n kõo sɩda, la rẽnda la Wẽnd sẽn yeele : {yõor sɩd-kũun pɑ le nɑfd-ɑ, t'a sã n dɑ pɑ kõ sɩd mɑɑ ɑ tʋmɑ ɑ sɩd-kũunã pʋgẽ sẽn sõmb ye.} [Al-An-Aam: 158], la dũni wã na n yikame, n mik tɩ raoap a yiibu, n tẽeg fuugu, n rat n na koose, b ka na n paam n koos-a ye, b ka na n paam n põd-a tɩ dũni ka yik ye, la dũni na n yika ned zugu, tɩ mik t’a ra kẽng n tɩ pẽe a yʋgʋmde, bĩisim la a ka na n paam yũ-a ye, dũni na n leb n yikame n mik tɩ ned manegd a garga la a ka na n yũ a pʋgẽ ye, la dũni na n yikame n mik tɩ yãmb nina yaa sẽn zẽk a sag-võre n rabd a noorẽ wã la a ka na n rɩ-a ye».

«Yãmb yembr sã n maan kaalem, b ballda a zĩndgã zĩigã, yibeoog la zaabre, sã n mik tɩ yaa arzãn neda yaa arzan neda, la sã n mik tɩ yaa Bugum neda yaa Bugum neda, tɩ b yeel-a: yãwã la fo zĩiga, halɩ tɩ Wẽnd wa tʋg n yik-fo alkiyaoom raarã».

«B na n waa ne kũum t’a wõnd pesg sẽn tẽgse, tɩ boaand boole : «yaa yãmb a arzãn koamba!» Tɩ bãmb sɩndg n getẽ, t’a yeele, rẽ yĩnga yãmb mii yãwã bɩɩ? Tɩ b yeele, n-yee, yãwã la kũum, tɩ b fãa gill yã-a. Rẽ poorẽ t’a lebg n boole: « yaa yãmb a Bugum koamba!» Tɩ bãmb me sɩndge n zẽk n yetẽ, t’a yeele, la yãmb mii yãwã bɩɩ? Tɩ b yeele, n-yee, yãwã la kũum, b fãa gillã me yã-a lame, tɩ b koadg-a, rẽ poorẽ tɩ b yeele: arzãn koambã, yãmb na n duumame tɩ kũum ka leb n be ye, yãmb a Bugum koamb me y na n duumame tɩ kũum ka be ye, rẽ poorẽ tɩ Nabiyaamã kareme {La bugs-b ne nĩmsã raarã, yellã sẽn wat n bʋ wã; tɩ bãmb yaool n be yam yaal-yaal pʋgẽ n ka kõt sɩd ye.} [Maryam: 39], bãmbã la dũni yam yaal-yaal neba {n ka kõt sɩd ye} [Maryam: 39]».

«Rẽ yĩnga, m ka na n kõ yãmb arzãn kẽedbã kibare? Ad yaa nin-valenga b sẽn valemds a soaba, a sã n wẽen ne Wẽnd t'a na maneg yelle, a sɩd manegdame. Rẽ yĩnga m ka na n kõ yãmb kibare ne Bugum koambã: yaa koko-kεgeng soaba, sẽn yaa rɩ-toog soaba n yaa waoog-m-meng soaba».

«B pẽnegda wĩntoogã dũni yikr raarã bõn-naandsã zutu, halɩ t'a wa lebg wala Miil alkadre,» a Sʋlaym ɭbn ʿAamir yeele: m wẽen ne Wẽnde, mam ka mi b yet tɩ Miilã yaa bõe la b rat ne? Yaa Tẽngã magbã bɩɩ? Maa yaa Miil ning sẽn yaa kɩrʋ bilã alkadre? A yeele: «Nebã na n yɩɩ b tʋʋmã alkadr tεka tʋʋlmẽ wã, bee beenẽ neb tʋʋlg sẽn na n ta b na-kuga, bee beenẽ neb tʋʋlg sẽn na n ta b rũma, be beenẽ neb tʋʋlg sẽn na n ta b yerb londo, be beenẽ neb tʋʋlg sẽn na n ta a noorẽ wã». La a yeele: La Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) tees a nugã a noorẽ wã.

«Ad yãmb yembr fãa zĩig arzãnã sẽn tʋg n yaa kɩdg n yɩɩda, yaa b sẽn na n yεεl-a: T'a tags yẽ sẽn rat bũmb ningã, tɩ b yεεl-a, fo saaga fo sẽn ratã fãa? T'a yeele: n-yee, T'a yεεl-a:Ad fo sẽn saag bũmb ningã fãa f paamame, la a bilg-n-taare n paase».

«Dũni ka na n yiki, halɩ tɩ yãmb wa tʋg n zab ne Yahuud-rãmbã, halɩ tɩ kugr ning yahuud sẽn solg a soab poorẽ wã wa yeele: «lɩslaamã! Wa kaanẽ, tɩ woto yaa Yahuudã sẽn be mam poorẽ, wa kʋ-a».