Encyclopedia of Prophetic Hadiths

«Ad Wẽnd ka wẽgd muunim baa yel-sõmd a yembr ye, A kõt-a-la dũni wã neemã sẽn tũ ne yel-sõmdã la A leb n rol-a rol sõngo laahr raare, la sã n yaa kɩfre, b rɩlgd-a-la dũni wã yẽ sẽn maan tʋʋm sõmbsã Wẽnd yĩngã, la a sã n wa tʋg n ta laahr raare, a ka na n tall baa yel-sõmd tɩ b na n rol-a ye».

Tõnd ra bee Wẽnd Tẽn-tʋʋmã nengẽ (Wẽnd pʋʋsg lɑ A tɩlgr be ɑ yĩngɑ), tõnd d wae, maa nii, maa d yopoe, t'a yeele: «yãmb ka na n balam Wẽnd Tẽn-tʋʋm laa?» La tõnd ra yɩɩme n yaa sẽn balam paalem nanda. Tɩ tõnd yeele; ad tõnd balma foom Wẽnd Tẽn-tʋʋma, rẽ poorẽ t'a yeele: «yãmb ka na n balam Wẽnd Tẽn-tʋʋm laa?» Tɩ tõnd yeele: ad tõnd balma foom Wẽnd Tẽrn-tʋʋma, rẽ poorẽ t'a leb n yeele: «Yãmb ka na n balam Wẽnd Tẽn-tʋʋm laa?» T'a yeele: tɩ tõnd tẽeg d nusã n yeele, tõnd balma foom Wẽnd Tẽn-tʋʋma, la yaa bõe la d na n tik n balam foom? T'a yeele: «Yaa y tũ Wẽnde, la y ra maan lagem-n-taar ne Wẽnd baa fʋɩ ye, la y pʋʋs wakat a nu wã la y tũ, -la a solga gom-bila- la y ra bõos nebã baa fʋɩ ye». La mam yãa tõnd sõorã pʋga neb sãnda tɩ b yembr fãa sãbg tõe n lʋɩɩme t'a ka kos ned t'a rɩk n kõ-a ye.

Yii Nabiyaamã nengẽ (Wẽnd pʋʋsg la A tɩlgr be a yĩnga) t'a rag n yɩɩme t'a sã n kẽ miisrã, a yetame: «Aʿʋʋzʋ Billaahɩ Al-ʿAẓɩɩm, Wabɩ waghɩhɩɩ Alkarɩɩm, wa sʋlṭaanɩhɩɩ Alƙadɩɩm, Min Aš-šayṭaan Arragɩɩm= m kota gũudum ne Wẽnd sẽn Zɩsã, la ne A Nengã sẽn yaa Wagellã, la A Naamã sẽn yaa kʋdrã, n yi a sʋɩtãan b sẽn lobã», tɩ ned yeele: sεε woto? Tɩ mam yeele: n-yee. T'a yeele: a sã n yeel woto, la sʋɩɩtãanã sẽn yeele: b gũ-a lame n yi maam raarã gilli.

«B mee lɩslɑɑngã zeng-raad a nu zugu, yaa kõ sɩda tɩ soab ka be sẽn tũud n tɩlg tɩ pa Wẽnd ye, a Mʋhammad me yaa Wẽnd Tẽn-tʋʋma, la Pʋʋsgã yãnesgo, la Zak kũuni, la Roogã kaagre, la Ramadaanã no-loeere».

Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) yeelame: «Wẽnd yeelame:Ned ning sẽn wa n maana Mam noang beem, ad M segla a soab ne zabre, la Mam yamba ka yɩ sẽn na n pẽneg Maam ne bũmbu, tɩ noom Maam n yɩɩd Mam sẽn maan faril ning n rogl-a wã ye, Mam yambã ka bake n pẽnegd Maam ne naafil-rãmba, halɩ tɩ M bʋ a nonglem, M sã n bʋ a nonglem, M lebgda a wʋmb ningã a sẽn wʋmdã, la a nifr ning a sẽn getã, la a nug ning a sẽn yõkdã, la a naoor ning a sẽn kẽnd ne wã. A sã n kos Maam, M na kõ-a, la a sã n kos Maam gũudum, M na maan-a gũudum, la Mam ka maand maas-maas ne yell Mam sẽn na n maan-a wala M sẽn maagd lɩslaam yõor yãkr ye, a kisa kũumã, tɩ Mam kisg a wẽngã maanego».

Raoa n wa Nabiyaamã nengẽ, -Wẽnd pʋʋsg la A tɩlgr be a yĩnga-, n yeele, Wẽnd Tẽn-tʋʋma, ad tõnd yembr fãa mi n paama a sũurẽ wã, bũmb ninga sẽn wat a sũurẽ wã a sã n na n yɩ tom-pegl tʋʋlga, yẽ n sõmb ne yẽnda, ne a sẽn na n gom yel-kãngã, tɩ (Nabiyaam) yeele " Allaahʋ akbar, Allaahʋ akbar, Pẽgr be ne Wẽnde, sẽn kɩta a rabrã tɩ legb yuus-yuusã».

M soka Nabiyaamã, (Wẽnd pʋʋsg la A tɩlgr be a yĩngɑ) yaa zũnuub pʋgo zɩslem n yɩɩd Wẽnd nengẽ? T'a yeele: «yaa fo sẽn na n maan mak-n-taag ne Wẽnde, tɩ Yẽ n yaool n naan foom», tɩ mam yeele: ad rẽ sɩd yaa yel-bedre, la m soke: rẽ poorẽ yaa bõe? T'a yeele: «yaa fo sẽn na n kʋ f biiga, fo sẽn yεεsd t'a na n wa naag foom n rɩ tɩ ka seke». Tɩ mam yeele: rẽ poorẽ yaa bõe? T'a yeele: «yaa fo sẽn na n yo ne f yak paga».

«Malεgsã ka kẽed zak ning baaga maa nin-naand sẽn be a pʋgẽ ye».