Encyclopedia of Prophetic Hadiths

«Ad tʋʋmã tũudɑ ne Anniya-rãmbã, lɑ ɑd ned fãɑ sẽn tʋme n be ne-ɑ, rẽnd ned ning sẽn maana higra (yikɑ Mɑk n kẽng Mɑdiin) tɩ yɑɑ Wẽnd lɑ A Tẽn-tʋʋmã yĩngɑ, rẽnd yẽ soɑb Yikrã yɩtɑ Wẽnd lɑ A Tẽn-tʋʋmɑ yĩngɑ, lɑ ned ning Yikrã sẽn wɑ n yɑɑ dũni lɑ ɑ tɩ bɑo, mɑɑ yɑɑ pɑgɑ lɑ a rɑt n furi, rẽnd yẽ yikrã yɑɑ ɑ sẽn yik n kẽng bũmb ning yĩngã n be ne-a»

«B mee lɩslɑɑngã zeng-raad a nu zugu, yaa kõ sɩda tɩ soab ka be sẽn tũud n tɩlg tɩ pa Wẽnd ye, a Mʋhammad me yaa Wẽnd Tẽn-tʋʋma, la Pʋʋsgã yãnesgo, la Zak kũuni, la Roogã kaagre, la Ramadaanã no-loeere».

«B sagla maam tɩ m zab ne nebã, halɩ tɩ b wa maan kaset tɩ soab sẽn na n tũ n tɩlg ka be ye, rẽnda Wẽnde, a Mʋhammad yaa Wẽnd Tẽn-tʋʋma, la b yals Pʋʋsgã, la b kõ Zakã, rẽnd b sã n maan woto, b gũu b zɩɩmã la b arzεgsã n yi maam, sã n ka lɩslaangã hakε b sẽn na n yãk n kɩsã, la b tʋʋmã geelg zaoo ne Wẽnde».

«Bũmb ning mam sẽn gɩdg yãmb ne-a, bɩ y zãag-y-yã-a, la mam sẽn n sagl yãmb ne bũmb ningã, bɩ y maan-y-yã-a, y pãng tõog tεka, ad bũmb ning sẽn halk sẽn reng-b yãmb taoorã, yaa b sogs toogã la b yõsbã ne b nabiyaam-rãmbã».

Yii Nabiyaamã (Wẽnd pʋʋsg la A tɩlgr be a yĩnga) a sẽn reeg n yi Wẽnd nengẽ, A Naam yɩ wagell n zẽke, A yeelame: «Yaa Mam yembse, ad Mam gɩdga wẽgd Mam zugu, n maan-a t'a yaa haraam yãmb ne taab sʋka, bɩ y ra wẽg taab ye, yãmb fãa gill yaa menemdba, sã n ka Mam sẽn kãnd a soaba, bɩ y bao kãndagr ne Maam tɩ M na kãndag-ya, Mam yembsã fãa gilli, yãmb yaa kombse, sã n ka Mam sẽn rɩlg a soaba, bɩ y bao rɩlgr ne Maam tɩ M na rɩlg-ya, Mam yembsã, yãmb fãa yaa zaala, sã n ka Mam sẽn yeelg a soaba, bɩ y bao yeelgr ne Maam tɩ M na yeelg-ya, Mam yembsã, yãmb tudgda yʋng la wĩndga la Maam n yaafd zunuubã zãnga, bɩ y kos yaafa ne Maam tɩ M yaaf-ya, Mam yembsã, yãmb ka na n tol n ta Mam namsgo, n na n nams Maam ye, y ka na n tol n ta mam nafa n na n naf-M ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã n yɩ n zoet Wẽnd tɩ yaa wala yãmb sʋka sẽn yɩɩda Wẽnd zoεεg sũuri, rẽnda ka na n paas Mam Naamã baa fʋɩ ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã lagem taaba n na n kɩɩs Wẽnd tɩ yaa wala yãmb sʋka nin-wẽng sũuri, rẽnda ka na n boog Mam Naamã baa fʋɩ ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã n yik n tɩ be zĩ-peell a yembre, n kos Maam tɩ mam kõ ned fãa a sẽn kosã, yẽ ka na n boog bũmb ning sẽn be Mam nengẽ, sã n ka wala sũpĩim sẽn boogd bũmb ningã tɩ b sã n kẽes-a mogrẽ, Mam yembsã, ad yaa yãmb tʋʋmã bala, tɩ Mam tigm-a n wa rol-ya, rẽnd ned ning sẽn wa n mik tɩ yaa sõma, bɩ a pẽg Wẽnde, la sẽn mika tɩ ka rẽ, bɩ a ra sãbs ned baa a yembr sã n ka a menga».

«Yãmb yembr fãa ka kõt sɩda (ne Wẽnde) hal t'a wa tʋg n nong ne a ma-biiga bũmb ning a sẽn nong ne a mengã».

«Yãmb ned fãa ka kõt sɩda halɩ t'a yamleoogã wa yɩ n tũ bũmb ning mam sẽn wa ne wã».

«Ned fãa tara doaag a sũgsã fãa zugu, wĩntoog sẽn na n puk fãa tɩ fo maneg zabd-n-tɑɑs a yiib ne taab sʋka, f tara doaaga, fo sẽn na n sõng ned ne a rũnga, n zẽk-a n zombg a rũngã zugu, maa n zẽk a teedã n roglge, yaa doaaga, gom-yɩlenga yaa doaaga, na-tagdr fãa fo sẽn yãk n rabd Pʋʋsgẽ yaa doaaga, la tus bũmb sẽn namsd nebã n yi sor zugu, yẽ me yaa doaaga».