Encyclopedia of Prophetic Hadiths

Mam yeelame : Wẽnd Tẽn-tʋʋma bãkã ko-tees yaa ne bõe? Tɩ Nabiyyamã yeele: «m wẽen ne a Mohammad yõorã sẽn be Ning nugẽ wã, ad bãkã ko-teesã waooglemã yɩɩda saaga ãdse la a bõn-witi, tɩ b woglemã yaa wala yʋng lik sẽn ka tar sawat keelem, arzãnã ko-teesã ned sẽn yũ b pʋgẽ, a kõn n leb tall ko-yũud lae ye, sambond a yiib n kiigd arzãnẽ wã, ned ning sẽn yũ fãa a kõn n tol n tall ko-yũud ye, a yalmã zarem yaa wala sẽn be Amaan n tʋg tãag ɭɩla, a koomã peelem yɩɩda bĩisim t’a noomã yɩɩd sɩɩdo».

«Ned ka sõmb n rõd a to ne dĩin yiib tʋʋm ye, a ka sõmb n rõd-a ne kɩfẽnd ye, sã n ka rẽnda a lebgd n waa yẽ zugu, sã n mikame t'a soabã ka woto»

Yii Nabiyaamã (Wẽnd pʋʋsg la A tɩlgr be a yĩnga) a sẽn reeg n yi Wẽnd nengẽ, A Naam yɩ wagell n zẽke, A yeelame: «Yaa Mam yembse, ad Mam gɩdga wẽgd Mam zugu, n maan-a t'a yaa haraam yãmb ne taab sʋka, bɩ y ra wẽg taab ye, yãmb fãa gill yaa menemdba, sã n ka Mam sẽn kãnd a soaba, bɩ y bao kãndagr ne Maam tɩ M na kãndag-ya, Mam yembsã fãa gilli, yãmb yaa kombse, sã n ka Mam sẽn rɩlg a soaba, bɩ y bao rɩlgr ne Maam tɩ M na rɩlg-ya, Mam yembsã, yãmb fãa yaa zaala, sã n ka Mam sẽn yeelg a soaba, bɩ y bao yeelgr ne Maam tɩ M na yeelg-ya, Mam yembsã, yãmb tudgda yʋng la wĩndga la Maam n yaafd zunuubã zãnga, bɩ y kos yaafa ne Maam tɩ M yaaf-ya, Mam yembsã, yãmb ka na n tol n ta Mam namsgo, n na n nams Maam ye, y ka na n tol n ta mam nafa n na n naf-M ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã n yɩ n zoet Wẽnd tɩ yaa wala yãmb sʋka sẽn yɩɩda Wẽnd zoεεg sũuri, rẽnda ka na n paas Mam Naamã baa fʋɩ ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã lagem taaba n na n kɩɩs Wẽnd tɩ yaa wala yãmb sʋka nin-wẽng sũuri, rẽnda ka na n boog Mam Naamã baa fʋɩ ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã n yik n tɩ be zĩ-peell a yembre, n kos Maam tɩ mam kõ ned fãa a sẽn kosã, yẽ ka na n boog bũmb ning sẽn be Mam nengẽ, sã n ka wala sũpĩim sẽn boogd bũmb ningã tɩ b sã n kẽes-a mogrẽ, Mam yembsã, ad yaa yãmb tʋʋmã bala, tɩ Mam tigm-a n wa rol-ya, rẽnd ned ning sẽn wa n mik tɩ yaa sõma, bɩ a pẽg Wẽnde, la sẽn mika tɩ ka rẽ, bɩ a ra sãbs ned baa a yembr sã n ka a menga».