Encyclopedia of Prophetic Hadiths

«wakat ning Wẽn d sẽn wa n naan arzãnã la Bugmã, A tʋmsa a Gibriila, tɩlgr be a yĩnga, arzãnẽ wã, n yeel-a : « ges-a la f ges bũmb ning Mam sẽn sεgl a pʋgẽ wã, n na n kõ nebã ». T’a Gibriil ges-a n lebg wa yeele : m wẽen ne Fo zɩslemã, ned ka be, n na n wʋm yãwã kibare, rẽndame t’a kẽ-a. Tɩ Wẽnd sagl tɩ b gũbg arzãnã ne yεl nins yõor sẽn kisã. La A yeel-a « ges-a la bũmb ning Mam sẽn sεgl tɩ be a pʋgẽ wã, n na n kõ nebã» . T’a lebg n tɩ ges-a, n mik tɩ b gilg-a lame ne yεl nins yõor sẽn kisi. T’a Gibriil yeele: “ m wẽen ne Fo zɩslemã, m yεεsdame tɩ ned baa a yembr kõn n kẽ-a ye” T’a yeele: kẽng n tɩ ges Bugmã la f ges bũmb ning Mam sẽn sεgl a pʋgẽ, n na n bĩng a nebã. T’a tʋg n ges-a, n mik tɩ Bugmã zombda taaba, t’a lebg n wa n yeel Wẽnde: “ m wẽen ne Fo zɩslemã ned baa a yembr kõn n kẽ yãwã ye”. Tɩ Wẽnd sagl tɩ b gilg Bugmã ne yõor yamleoog teedo, tɩ Wẽnd yeel-a: “lebg n tɩ ges-a”. T’a Gibriil tʋg n ges-a, n mik t’a yaa sẽn gũbg ne yõyã yamleoodo, t’a lebg n wa yeele: “ m wẽen ne Fo zɩslemã, ad mam yεεsdame tɩ ned baa a yembr ka na n põse, n ka kẽ Bugmã ye».

«Ned ning sẽn wa n tʋg n wẽena ne Amaana (bas-m-yam), yẽ soab ka be ne tõnd ye»

Wẽnd Tẽn-tʋʋmã, (Wẽnd pʋʋsg la A tɩlgr be a yĩngɑ) a yalsa tõnd sʋk raar a yembre, n maan tõnd waazʋ, waazʋ sẽn ta tεka, tɩ sũy rigim a poorẽ, tɩ nintãm wɩdem a poorẽ, tɩ b yeele: Wẽnd Tẽn-tʋʋma, fo maana tõnd Wẽnd-na-wat-ne waazʋ, bɩ f rɩk alkaool ne tõndo. T'a yeele: «M kengd-y-la ne Wẽnd zoεεga la sak-n-tũ, la yãmb na n yãa mam poorẽ, yõs taab wʋsgo, bɩ y gãd mam Sunnah la lεdsdb nins sẽn yaa tẽeg tɩrg-rãmbã, sẽn yaa kãndgdbã Sunnah, gãd-y rẽndã ne yẽn-wãbdɩ la m kengd yãmb tɩ y zãag yεl sɩngdsã, tɩ ad Bid'ah buud fãa yaa menengo».

Mam da yɩɩme n gʋlsd bũmb fãa mam sẽn wʋm Wẽnd Tẽn-tʋʋmã nengẽ (Wẽnd pʋʋsg la A tɩlgr be a yĩnga), n rat n na n ruls-a, tɩ Ƙʋrays-rãmb gɩdg maam n yeele: fo gʋlsda bũmbã fãa fo sẽn wʋmd Wẽnd Tẽn-tʋʋmã (Wẽnd pʋʋsg la A tɩlgr be a yĩnga) nengẽ, tɩ Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yaool n yaa ninsaala n gomd a gẽeg wakat la a yard wakato, tɩ mam bas gʋlsgã, la m togs Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yel-kãngã, t'a rɩk a nug-bilã n tees a noorã, n yeele: «Gʋlse, tɩ m wẽen ne Naab Ning mam yõorã sẽn be a soab nugẽ wã, ad bũmb ka yit a pʋgẽ tɩ sã n ka sɩd ye».

Mam tũu Banii Aaamir-rãmb watbã, n kẽng Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) nengẽ, tɩ tõnd yeele: foom la tõnd zu-soaba, tɩ Nabiyaamã yeele: «ad zu-soabã yaa Wẽnde», tɩ tõnd leb n yeele: foom n leb n yɩɩd tõnd ne yɩɩdlem n leb n yɩɩd tõnd ne kũuni, 'ta yeele: «yeel-y wala yãmb sẽn da yeta bala, maa yeel-y rẽ sãnda, la y ra bas t'a sʋɩɩtãan tak yãmb n kẽng wẽngẽ ye».

Yii Nabiyaamã nengẽ (Wẽnd pʋʋsg la A tɩlgr be a yĩnga) t'a rag n yɩɩme t'a sã n kẽ miisrã, a yetame: «Aʿʋʋzʋ Billaahɩ Al-ʿAẓɩɩm, Wabɩ waghɩhɩɩ Alkarɩɩm, wa sʋlṭaanɩhɩɩ Alƙadɩɩm, Min Aš-šayṭaan Arragɩɩm= m kota gũudum ne Wẽnd sẽn Zɩsã, la ne A Nengã sẽn yaa Wagellã, la A Naamã sẽn yaa kʋdrã, n yi a sʋɩtãan b sẽn lobã», tɩ ned yeele: sεε woto? Tɩ mam yeele: n-yee. T'a yeele: a sã n yeel woto, la sʋɩɩtãanã sẽn yeele: b gũ-a lame n yi maam raarã gilli.

Raoa n wa Nabiyaamã nengẽ, -Wẽnd pʋʋsg la A tɩlgr be a yĩnga-, n yeele, Wẽnd Tẽn-tʋʋma, ad tõnd yembr fãa mi n paama a sũurẽ wã, bũmb ninga sẽn wat a sũurẽ wã a sã n na n yɩ tom-pegl tʋʋlga, yẽ n sõmb ne yẽnda, ne a sẽn na n gom yel-kãngã, tɩ (Nabiyaam) yeele " Allaahʋ akbar, Allaahʋ akbar, Pẽgr be ne Wẽnde, sẽn kɩta a rabrã tɩ legb yuus-yuusã».

«Yaa sɩda, ad sã n wa beẽ, neb n na n zĩndi tɩ mam hadiis (gomd) wa tʋg n ta a nengẽ, t’a yaa sẽn kɩll a zaoog zugu, n yetẽ : « ad tõnd ne yãmb sʋka yaa Wẽnd Gafã bal n be d sʋka, bũmb ning tõnd sẽn mik Wẽnd Gafã pʋgẽ tɩ yaa halaalã, d na n maaname tɩ yaa halaale, la d sẽn mik a pʋgẽ tɩ yaa haraam d na n maaname tɩ yẽ yaa haraam, la hadiis ka pak tõnd ye, la b bãng tɩ bũmb ning Wẽnd Tẽn-tʋʋmã (Wẽnd pʋʋsg la A tɩlg be a yĩnga) sẽn harm-a, a yaa wala Wẽnd sẽn haram bala».