Encyclopedia of Prophetic Hadiths

«Yãmb ned fãa ka kõt sɩda halɩ t'a yamleoogã wa yɩ n tũ bũmb ning mam sẽn wa ne wã».

«Ad tʋʋmã tũudɑ ne Anniya-rãmbã, lɑ ɑd ned fãɑ sẽn dɩk Anniy ningã n be ne-ɑ, rẽnd ned ning sẽn maana Higra (yik Mɑk n kẽng Mɑdiinã) tɩ yɑɑ Wẽnd lɑ A Tẽn-tʋʋmã yĩngɑ, rẽnd yẽ soɑb Yikrã yɩtɑ Wẽnd lɑ A Tẽn-tʋʋmɑ yĩngɑ, lɑ ned ning Yikrã sẽn wɑ n yɑɑ dũni yĩnga n rɑt n nɑ n pɑɑm-ɑ, mɑɑ yɑɑ pɑgɑ lɑ a rɑt n furi, rẽnd yẽ yikrã yɑɑ ɑ sẽn yik n kẽng bũmb ning yĩngã». La gom-bila a yembr n be Albʋhaary pʋga: « Ad tʋʋmã yaa ne Anniy-rãmbã, la ninsaal fãa yaa a sẽn maan Anniy ningã n be ne-a».

« Wẽnd rɩka bilgri ne sor sẽn tẽeg tɩrga, la sorã kɩrems a yiibã lals a yiib n be beenẽ, la ragnoy n be lalsẽ wã, sẽn pagse, la ragnoy wã fu-rot n be beene, sẽn lagm n tak n ludi, la sorã noorẽ boaand n be n yetẽ: yãmb ɑ nebã, tũ-y sorã y fãa gilli, la y ra gõdg ye, tɩ boaand a to be sorã yĩngr, t'ɑ sã n rat n na n pak ragnoor ragno-kãensã pʋga la ɑ sẽn yete: gũus f menga, la f ra pak-a ye, ad fo sã n pak-a, f na n kẽ a pʋgẽ, La sorã la lɩslaoongã, la lalsa a yiibã: yɑɑ Wẽnd todsã, la ragnoy nins sẽn pagsã: yaa Wẽnd sẽn gɩdg yεl ninsã, la ad boaand ning sẽn be sorã zugã, yẽ yaa Wẽnd Gafã, la boaand ning sẽn boonda sorã yĩngrã, yẽ yaa Wẽnd zoεεga la A waazo wã sẽn be lɩslaam fãa sũurẽ wã ».

Wẽnd Tẽn-tʋʋmã rag n yɩɩme (Wẽnd pʋʋsg la A tɩlgr be a yĩnga) n wʋsgd n yetẽ: «Yaa muƙallib al-ƙuluub ṯabbit ƙalbiy ʿalaa diinik= Foom a sũyã Toεεmda tablg mam sũurã Fo dĩinã zugu», tɩ mam yeele: Wẽnd Tẽn-tʋʋmã, tõnd kõo sɩd ne foom la fo sẽn wa ne bũmb ningã, la rẽ yĩnga fo yεεsdame tɩ tõnd na menem bɩɩ? La a yeel yã: «n-yee, ad sũyã bee nus-biya a yiib sʋka, sẽn yaa Wẽnd nus-biyã, t'A lεεbd-b A sẽn tʋll to-to».

«B balla arzãnã la Bugmã n wilg maam, tɩ mam ka yã bũmb sõmblem sẽn yɩɩd mam sẽn yã rũndã wã ye, la mam ka yã wẽng me n yɩɩd mam sẽn yã rũndã wã ye, la yãmb sã n rag n yã bũmb ning mam sẽn yã wã, la y bãng bũmb ning mam sẽn bãngã, y laadã rag n na yɩ bilfu, tɩ kũnkumã wʋsge». A Anas yeelame, (Wẽnd yard be a yĩnga) la rar ka wa Tẽn-tʋʋmã sahaabsẽ (Wẽnd pʋʋsg la A tɩlgr be a yĩnga) t'a keelem yɩɩd ra-kãngã ye, tɩ b koeesã yaa sẽn wũundi kũnkumã keelem, t'a ʿƲmar (Wẽnd yard be a yĩnga) yeele: (D yɑrɑ Wẽnd tɩ yɑɑ d Soɑbɑ lɑ Lɩslɑɑngã tɩ yɑɑ d dĩin lɑ ɑ Mʋhɑmmɑd tɩ yaɑ d Nɑbiyɑɑmɑ). A yeelame: tɩ rao yik n yeele: ãna la mam saamba? Tɩ Wẽnd sik Aayarã: {Yãmb a sɩd-kõtba! Ra n sok-y yεla, tɩ b sã n vẽneg-b n wĩnig yãmba, pa noom yãmb ye} [Al-Maa'ɩda (Rɩɩbã sʋʋra): 101]

«Mam poorẽ rãmbã fãa yaa sẽn yɑɑf-b rãmbɑ, sã n ka vẽnegdbã, la sẽn be vẽnegrã pʋgẽ, yaa ned sẽn na n maan tʋʋm yʋngo, n vẽeg beoog tɩ Wẽnd luda a bãngo, t'a tʋg n yetẽ: zagla! Ad yʋngẽ mam maana woto la woto, ad yẽ rag n gãanda yʋngẽ t'a Soabã yaa sẽn lud a bãngo, t'a vẽeg beoong n pãrgd Wẽnd sʋtrã (bãn-loeerã) n basd a mengã».

«Ad Wẽne, (A Naam yɩ wagell n zẽke) A tẽegda A nugã yʋngo, sẽn na yɩl tɩ wĩndg wẽngd tuubi, la A tẽegd A nugã wĩndgã sẽn na yɩl tɩ yʋng wẽngd tuubi, halɩ tɩ wĩndgã wa tʋg n puk a sẽn lʋɩtẽ wã».

«Wẽnd yeelame (A Naam zẽk yã) Mam seglame M yemb-sõmsã yĩnga, nifr sẽn na n ka yã, tɩ tʋbr ka wʋme la ka lʋɩ ninsaal tagsg pʋgẽ». A Abuu Hʋrayrat yeelame: karem-y tɩ yãmb sã n tʋlla: {Rẽnd yõor kɑ mi b sẽn solg n bĩng bãmbã sẽn yɑɑ sũ-noog lɑ nif mɑɑgr tεkẽ, tɩ yɑɑ b sẽn dɑ yɩ n tʋmdẽ wã rolbo} [As-sagda: 17].