Encyclopedia of Prophetic Hadiths

«Kõbg a yiib sẽn yi Bugum koambẽ wã, mam ka yã b buud lae, yaa nebã b tara sãbse, tɩ yaa wala yʋgmã zʋya tɩ b pãbd nebã ne-ba, la pagba sẽn yeelge n yaool n yaa bεεla, n toeemd rao yam, n kẽnd n kɩlledẽ, b zutã yaa wala yʋgma zẽg sẽn kɩlle, b ka na n kẽ arzãnã, b ka na n wʋm a yũugã, la arzãn yũuga bee fo sẽn na n kẽn woto la woto zĩigẽ».

«Ad tʋʋmã tũudɑ ne Anniya-rãmbã, lɑ ɑd ned fãɑ sẽn dɩk Anniy ningã n be ne-ɑ, rẽnd ned ning sẽn maana Higra (yik Mɑk n kẽng Mɑdiinã) tɩ yɑɑ Wẽnd lɑ A Tẽn-tʋʋmã yĩngɑ, rẽnd yẽ soɑb Yikrã yɩtɑ Wẽnd lɑ A Tẽn-tʋʋmɑ yĩngɑ, lɑ ned ning Yikrã sẽn wɑ n yɑɑ dũni yĩnga n rɑt n nɑ n pɑɑm-ɑ, mɑɑ yɑɑ pɑgɑ lɑ a rɑt n furi, rẽnd yẽ yikrã yɑɑ ɑ sẽn yik n kẽng bũmb ning yĩngã». La gom-bila a yembr n be Albʋhaary pʋga: « Ad tʋʋmã yaa ne Anniy-rãmbã, la ninsaal fãa yaa a sẽn maan Anniy ningã n be ne-a».

«B balla arzãnã la Bugmã n wilg maam, tɩ mam ka yã bũmb sõmblem sẽn yɩɩd mam sẽn yã rũndã wã ye, la mam ka yã wẽng me n yɩɩd mam sẽn yã rũndã wã ye, la yãmb sã n rag n yã bũmb ning mam sẽn yã wã, la y bãng bũmb ning mam sẽn bãngã, y laadã rag n na yɩ bilfu, tɩ kũnkumã wʋsge». A Anas yeelame, (Wẽnd yard be a yĩnga) la rar ka wa Tẽn-tʋʋmã sahaabsẽ (Wẽnd pʋʋsg la A tɩlgr be a yĩnga) t'a keelem yɩɩd ra-kãngã ye, tɩ b koeesã yaa sẽn wũundi kũnkumã keelem, t'a ʿƲmar (Wẽnd yard be a yĩnga) yeele: (D yɑrɑ Wẽnd tɩ yɑɑ d Soɑbɑ lɑ Lɩslɑɑngã tɩ yɑɑ d dĩin lɑ ɑ Mʋhɑmmɑd tɩ yaɑ d Nɑbiyɑɑmɑ). A yeelame: tɩ rao yik n yeele: ãna la mam saamba? Tɩ Wẽnd sik Aayarã: {Yãmb a sɩd-kõtba! Ra n sok-y yεla, tɩ b sã n vẽneg-b n wĩnig yãmba, pa noom yãmb ye} [Al-Maa'ɩda (Rɩɩbã sʋʋra): 101]

«Mam poorẽ rãmbã fãa yaa sẽn yɑɑf-b rãmbɑ, sã n ka vẽnegdbã, la sẽn be vẽnegrã pʋgẽ, yaa ned sẽn na n maan tʋʋm yʋngo, n vẽeg beoog tɩ Wẽnd luda a bãngo, t'a tʋg n yetẽ: zagla! Ad yʋngẽ mam maana woto la woto, ad yẽ rag n gãanda yʋngẽ t'a Soabã yaa sẽn lud a bãngo, t'a vẽeg beoong n pãrgd Wẽnd sʋtrã (bãn-loeerã) n basd a mengã».

«Ad Wẽne, (A Naam yɩ wagell n zẽke) A tẽegda A nugã yʋngo, sẽn na yɩl tɩ wĩndg wẽngd tuubi, la A tẽegd A nugã wĩndgã sẽn na yɩl tɩ yʋng wẽngd tuubi, halɩ tɩ wĩndgã wa tʋg n puk a sẽn lʋɩtẽ wã».

«Wẽnd yeelame (A Naam zẽk yã) Mam seglame M yemb-sõmsã yĩnga, nifr sẽn na n ka yã, tɩ tʋbr ka wʋme la ka lʋɩ ninsaal tagsg pʋgẽ». A Abuu Hʋrayrat yeelame: karem-y tɩ yãmb sã n tʋlla: {Rẽnd yõor kɑ mi b sẽn solg n bĩng bãmbã sẽn yɑɑ sũ-noog lɑ nif mɑɑgr tεkẽ, tɩ yɑɑ b sẽn dɑ yɩ n tʋmdẽ wã rolbo} [As-sagda: 17].

Tõnd rag n yɩɩme n be ne Wẽnd Tẽn-tʋʋmã (Wẽnd pʋʋsg la A tɩlgr be a yĩnga) t'a wʋm bũmb sẽn lʋɩ, tɩ Nabiyaamã yeele (Wẽnd pʋʋsg la A tɩlgr be a yĩnga) «Yãmb mii sẽn yaa bũmb ningã bɩɩ?» T'a Abʋʋ Hʋrayrat yeele: Tɩ tõnd yeele: Wẽnd la A Tẽn-tʋʋmã n yɩɩd minim. Tɩ Nabiyaamã yeele: «Yãwã yaa kugr b sẽn lob Bugmã pʋga hal yʋʋm tus-pis-yopoe, masa la a lʋɩt Bugmã pʋgẽ, n tãag a tεkẽ wã».

«Ges-y neb nins sẽn be yãmb tẽngrã, la y ra ges neb nins sẽn be yãmb yĩngrã ye, rẽnda n pẽ n yɩɩd tɩ yãmb ra wa paoog Wẽnd neemã wã sẽn be yãmb zugã».