Encyclopedia of Prophetic Hadiths

«B balla arzãnã la Bugmã n wilg maam, tɩ mam ka yã bũmb sõmblem sẽn yɩɩd mam sẽn yã rũndã wã ye, la mam ka yã wẽng me n yɩɩd mam sẽn yã rũndã wã ye, la yãmb sã n rag n yã bũmb ning mam sẽn yã wã, la y bãng bũmb ning mam sẽn bãngã, y laadã rag n na yɩ bilfu, tɩ kũnkumã wʋsge». A Anas yeelame, (Wẽnd yard be a yĩnga) la rar ka wa Tẽn-tʋʋmã sahaabsẽ (Wẽnd pʋʋsg la A tɩlgr be a yĩnga) t'a keelem yɩɩd ra-kãngã ye, tɩ b koeesã yaa sẽn wũundi kũnkumã keelem, t'a ʿƲmar (Wẽnd yard be a yĩnga) yeele: (D yɑrɑ Wẽnd tɩ yɑɑ d Soɑbɑ lɑ Lɩslɑɑngã tɩ yɑɑ d dĩin lɑ ɑ Mʋhɑmmɑd tɩ yaɑ d Nɑbiyɑɑmɑ). A yeelame: tɩ rao yik n yeele: ãna la mam saamba? Tɩ Wẽnd sik Aayarã: {Yãmb a sɩd-kõtba! Ra n sok-y yεla, tɩ b sã n vẽneg-b n wĩnig yãmba, pa noom yãmb ye} [Al-Maa'ɩda (Rɩɩbã sʋʋra): 101]

«Mam poorẽ rãmbã fãa yaa sẽn yɑɑf-b rãmbɑ, sã n ka vẽnegdbã, la sẽn be vẽnegrã pʋgẽ, yaa ned sẽn na n maan tʋʋm yʋngo, n vẽeg beoog tɩ Wẽnd luda a bãngo, t'a tʋg n yetẽ: zagla! Ad yʋngẽ mam maana woto la woto, ad yẽ rag n gãanda yʋngẽ t'a Soabã yaa sẽn lud a bãngo, t'a vẽeg beoong n pãrgd Wẽnd sʋtrã (bãn-loeerã) n basd a mengã».

«Ad Wẽne, (A Naam yɩ wagell n zẽke) A tẽegda A nugã yʋngo, sẽn na yɩl tɩ wĩndg wẽngd tuubi, la A tẽegd A nugã wĩndgã sẽn na yɩl tɩ yʋng wẽngd tuubi, halɩ tɩ wĩndgã wa tʋg n puk a sẽn lʋɩtẽ wã».

«M Soab A Wẽnde, yaaf-ma m sẽn tudgi la m sẽn zɩ la m maan-n-zʋʋkã m yellã fãa pʋgẽ, la Fo sẽn mi bũmb ninga n yɩɩd maam. M Soab A Wẽnde, yaaf-ma m sẽn tudgi la m pʋ-toogo, la m zɩɩlem la m reem, la woto fãa gill yii mam nengẽ. M Soab A Wẽnde, yaaf-ma m sẽn tʋm tɩ reng taoore, lɑ m sẽn yɑoolge, lɑ m sẽn solge la m sẽn vẽnege, Foom A Wẽnd la Lʋɩɩs taoor Naaba, la Foom la Yaoolgda, la Foom la bũmbã fãa gill Tõogda».

«Yãmb ned fãa ra wa yeele: m Soab A Wẽnde, yaaf-ma tɩ F sã n rata, yols maam tɩ F sã n rata, rɩlg maam tɩ F sã n rata. La a sã n na n kos bɩ a kos vẽenega, tɩ ad Wẽnd maanda A sẽn rate, modgd ka be ne-A ye»

«Ned sã n kẽ a zakẽ, n tẽeg Wẽnd yʋʋre, a sẽn wat n kẽedẽ wã la a sẽn wat n rɩtẽ wã, a sʋɩɩtãan yetame: mam gãag zĩig ka be ne yãmb rũndã, mam ka tar rɩɩb me yãmb nengẽ, la a sã n kẽ n ka tẽeg Wẽnd yʋʋr a sẽn wat n kẽedẽ wã, la a sʋɩɩtãan sẽn yete: y paama gãag zĩiga, la a sã n leb n ka tẽeg Wẽnd yʋʋrã a rɩɩbẽ wã, la a sẽn yete: y paama gãag zĩiga la rɩɩbo».

Weoogẽ ned n wa Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) n yeel-a: wilg maam goam tɩ m yetẽ. La Nabiyaamã yeel-a: «yeele: Laa ɩlaaha ɩllallaahʋ, wahdahʋʋ, laa šarɩɩka lahʋʋ, Allaahʋ Akbarʋ kaṯɩɩran; wal hamdʋ lillaah kaṯɩɩran, sʋbhaanallaahɩ Rabbi Al-ʿAalamiina, laahawla walaa ƙuwwata illaa billaahɩ Al-ʿAzɩɩzɩ Al-hakɩɩmɩ». La a yeele: Tɩ bãmbã yaa mam Soabã n so, la mam rẽndã bεε? La a yeele: «yeele: Allahʋmma agfɩrlɩɩ wa Arhamnii wahdinii wa Ar-zuƙnii».

«Yãmb a nebã, ad Wẽnd yaa yɩlgemde, la A ka reegd rẽnda yɩlgemde, la ad Wẽnd sagla sɩd-kõtbã ne bũmb ning A sẽn sagl tẽn-tʋʋmbã; n yeele: {Yãmb ɑ Tẽn-tʋʋmba! Rɩ-y rɩ-yɩlmã sẽn yaa halaal rɩɩbo, la y maan tʋʋm-sõma, ad Mam mii yãmb sẽn maand bũmb ninsã wã}. [23. Al-muu'minuun (Sɩd-kõtbã sʋʋra): 52 ] la A yeele: {Yɑɑ yãmb sẽn kõ-b sɩdɑ! Rɩ-y bõn-yɩlmɑ Tõnd sẽn rɩlg yãmbã lɑ y pʋʋs Wẽnd bɑrk tɩ sã n yɑɑ Yẽ lɑ y tũudã} [2. Al-baƙara (Naafã sʋʋra):172]. Rẽ poorẽ tɩ Nɑbiyɑɑmɑ tẽeg rao yelle, sor sẽn wogle, t'a zugã bɩre n puki, t'a zẽk a nus a yiibã n tʋg saasẽ wã n yetẽ: "m Soab A Wẽnde! Sõng-ma", la a rɩtlã yaa haraam, a sẽn yeelgã yaa haraam, a bõn-yũudɩ wã yaa haraam, b leb n rɩlg-a-la ne haraam, b na n reega kos-kãngã wãn-wãna?»