Encyclopedia of Prophetic Hadiths

«مه‌ته‌لا هه‌ڤالێ باش و هه‌ڤالێ خراب وه‌كی خودانێ مسكێ و ئه‌وێ كویرها ئاسنی (كو ئاسنگه‌ره‌) خۆش دكه‌ت،‌ خودانێ مسكێ: یان دێ هنده‌كێ ده‌ته‌ ته‌، یان دێ ژێ كڕی، یان ژی دێ بێهنه‌كا خۆش ژێ هێته‌ ته‌. به‌لێ هندیكه‌ ئه‌وه‌ یێ كویرها ئاسنی خۆش دكه‌ت‌: یان دێ جلكێن ته‌ سۆژیت، یان ژی دێ بێهنه‌كا پیس ژێ هێته‌ ته‌».

((پاقژی نیڤا باوەرییێیە، و (الحَمدُ لِلهِ) تەڕازییێ تژی دکەت و (سُبحانَ اللهِ وَالحَمدُ لِلهِ) ژی د ناڤبەرا ئەسمان و ئەردیدا تژی دكه‌ن - یان تژی دکەت -. نڤێژ ڕۆناهییە، خێر و صه‌ده‌قه‌ بەڵگەیە، صەبڕ و هه‌دار ڕۆناهییە، قورئان بەڵگەیە بۆ تە یان ل سەر تە. هەمی خەلك سپێدێ زوی ژ مال ده‌ردكه‌ڤن (ئانكو ڕۆژا خۆ ده‌ستپێدكه‌ن و بۆ خۆ كار دكه‌ن) و نه‌فسێن خۆ دفرۆشن؛ ڤێجا یان ڤێ نه‌فسێ ئازاد دکەن یان ژ ناڤ دبەن)).

((هەر کەسێ (ل ڕۆژا قیامەتێ) بگه‌هیته‌ دیدارا خودێ و وی چ شریك و هه‌ڤال بۆ خودێ دروست نه‌كربن؛ دێ چیته‌ به‌هه‌شتێ، و هه‌ر کەسێ (ل ڕۆژا قیامەتێ) بگه‌هیته‌ دیدارا خودێ و وی شریك و هه‌ڤاله‌ك بۆ خودێ دروست كربیت؛ دێ چیته‌ جه‌هنه‌مێ)).

((خۆشتڤیترین گۆتن ل ده‌ڤ خودێ چار گۆتنن: خودێ یێ دویر و پاقژه‌ ژ هه‌می كێماسییان (سُبْحَانَ اللهِ)، سوپاسی هه‌می بۆ خودێ بن (الْحَمْدُ لِلهِ)، ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن (لَا إِلَهَ إِلَّا اللهُ) و خودێ مه‌زنترینه‌ (اللهُ أَكْبَرُ)، تو ژ كیژكێ ده‌ستپێبكه‌ی ژی دروسته‌ و چ زیان تێدا نینه‌)).

من ده‌رباره‌ی باشی و خرابییێ پرسیار ژ پێغه‌مبه‌رێ خودێ (صه‌لات و سه‌لامێن خودێ ل سه‌ر بن) كر، ئینا گۆت: ((باشی ڕه‌وشتێ جوانه‌، خرابی ژی ئه‌و تشته‌ یێ د سینگێ ته‌دا بهێت و بچیت و ته‌ پێ نه‌خۆش بیت خه‌لك پێ ئاگه‌هدار بن)).

((نێزیكترین جھ و ده‌م مرۆڤ تێدا یێ نێزیكی خودێ بیت؛ ئه‌وه‌ ده‌مێ مرۆڤ تێدا دچیته‌ سوجدێ، له‌وا هوین گه‌له‌ك دوعایان د سوجدێدا بكه‌ن)).

((مسوگه‌ر حه‌لال یێ ئاشكه‌رایه‌ و حه‌رام ژی یێ ئاشكه‌رایه‌، د ناڤبه‌را وان هه‌ردووكان ژیدا هنده‌ك كارێن نه‌ئاشكه‌را هه‌نه‌ كو گه‌له‌ك كه‌س وان نزانن، ڤێجا هه‌ر كه‌سێ خۆ ژ كارێن نه‌ئاشكه‌را بپارێزیت؛ ئه‌ڤه‌ وی دینێ خۆ و نامویسا خۆ پاراست، و هه‌ر كه‌سێ بكه‌ڤیته‌ د ناڤ واندا؛ ئه‌ڤه‌ ئه‌و كه‌ڤته‌ د ناڤ حه‌رامییێدا. وه‌كی شڤانی ده‌مێ په‌زێ خۆ ل دۆر پاوانی دچه‌رینیت، نێزیكه‌ ئه‌ڤ په‌زه‌ بچیته‌ د ناڤدا و بچه‌رینیت، بزانن كو هه‌ر مه‌لكه‌كی پاوانه‌ك هه‌یه‌ و پاوانێ خودێ ژی ئه‌و تشتن یێن وی حه‌رام كرین، بزانن كو پارچه‌یه‌ك د له‌شیدا هه‌یه‌؛ ئه‌گه‌ر باش بوو؛ له‌ش هه‌می دێ باش بیت و ئه‌گه‌ر خراب بوو؛ له‌ش هه‌می دێ خراب بیت، ئه‌و پارچه‌ ژی دله‌)).

من گۆت: ئەی پێغەمبەرێ خودێ، ئاخڤتنه‌كێ د ئیسلامێدا بۆ من بێژە کو ژ بلی تە پرسیارێ ژ كه‌سه‌كێ دی نەکەم، گۆت: ((بێژە: من باوەری ب خودێ ئینا، پاشی ل سه‌ر ڤێ گۆتنێ به‌رده‌وامبه‌ و ڕاسته‌ڕێبه‌)).